मनःपूर्वक आभार

इंडिब्लॉगतर्फे नुकत्याच झालेल्या स्पर्धेत माझा हा मराठी साहित्यावरील ब्लॉग सर्वोत्कृष्ट मराठी ब्लॉग म्हणून निवडण्यात आला.

यानिमित्ताने मी सर्व वाचकांचे आणि सह-ब्लॉगर्सचे आभार मानू इच्छितो. आपण वेळोवेळी माझ्या ब्लॉगला भेट देत रहाल आणि आपल्या प्रतिक्रिया नोंदवत रहाल अशी आशा करतो.

कृत्रिम विनय म्हणून म्हणत नाही, पण यात माझा वाटा तसा फार कमी आहे. मी केवळ मराठी साहित्यात जे जे मला आवडले ते ते येथे मांडत गेलो. मी जेव्हा हा ब्लॉग सुरु केला तेव्हा अगदी थोडे मराठी ब्लॉग्ज मला माहीत होते आणि त्यामुळे याला कितपत प्रतिसाद लाभेल अशी शंका होती. परंतु, गेल्या सहा महिन्यात सुमारे ३५०० हून अधिक वेळा या ब्लॉगला नेटकरांनी भेट दिली आणि ही शंका निराधार ठरवली.

मराठी ब्लॉगविश्वाचे तर आम्ही समस्त मराठी ब्लॉगर्सनी विशेष आभार मानले पाहिजेत. या व्यासपीठामुळेच नवनवीन मराठी ब्लॉग्जची माहिती मिळते, वाचकांनाही एकाच जागी नवीन लेख कुठल्या ब्लॉगवर प्रसिद्ध झाला आहे याची माहिती मिळते आणि शिवाय स्वतःचा ब्लॉग सुरु करायची प्रेरणा मिळते. गेल्या काही दिवसांत झपाट्याने जे नवीन मराठी ब्लॉग्ज सुरू झालेले आहेत, ते या विधानाला पुष्टीच देतील. या संकेतस्थळाबद्दल पवन आणि देबाशिष यांचे विशेष आभार.